Eguneko argazki bat
Wildhaus (Suitza)
Arbola suak akabatuko zuen? Belztuta dagoela ematen du. Kiskali ondoren inguruko landareek bizitza bueltan ekartzen lana izango zuten, baina bizidun berriek ez diote izkin egin biztanle zaharrari. Oparoa da inguruan hazi den landaretza. Lore txiki horiak edo moreak, belar berdea, asunak metatu dira enbor zaharraren inguruan.
Wildhaus (Suitza)
Itxura ederra hartu du enbor hilak. Barruak bizi galdu bazuten ere, eskultura ederra utzi dute. Horrela ikus dezakete albotik pasatzen den edonor. Bizi berria sortu da dagoeneko, baina. Pinu txiki gazte bat ari da hazten zaharrago hilaren ondoan, bere babesa hartu nahian edo.
Wildhaus (Suitza)
Zerua urdin dago eta haizerik ez dabil eta eguzkiak gogoz berotzen du. Udako egun betea daukagu. Mendi goietan, baina, sargoriak ez du hain gogor jotzen. Hori eskerrak, paseo txikia egitera irtetzeko aukera izan dugu eta bidean paisai zoragarria ikusi ere egin dugu.
Wildhaus (Suitza)
Zer gertatuko zen bi zuhaitz enbor soiletan bihurtuak izateko? Mendi ekaitz baten erdian tximista batek jo eta erreko zituen? Edo abeltzain ganoragabe batek uda amaierako garbiketa egin eta bi hauengan erreparatu ez zuen egingo?
Wildhaus (Suitza)
Goi mendietan larreek itxura zoragarria izaten dute uda partean. Pinu gutxi batzuk ere agertzen dira tarteka. Eta guztien gainetik zeru zabala, urdina eta hodei zuriez josita. Horrela da eguraldi oneko egunetan behintzat.
Waserauen (Suitza)
Atsedena hartu, lo kuluxka bat bota, belarra jaten amaitu. Lasaitasun momentu bat denoi datorkigu ongi. Hark lurrean etsanda egingo du, gu mendian ibilaldi txikia eginez.
Waserauen (Suitza)
Arrokaz osatutako mendi erraldoia argi ikus daiteke haranaren bukaeran. Bere goiak elur zuriz apainduak ageri dira. Kolore bereko hodeiak zeru garbian mugitzen dira mendietako gailurrak bere altzoan hartuz.
Waserauen (Suitza)
Mendi haran berde eta arbolatsua estu-estua da eta mendi gain altuenetara joateko bidea da. Bidean aurkitzen diren etxaldeak artzainen udako etxeak dira, behiak eta ahuntzak mendi-belardietan haztera dihoazenean.
Craveggia (Italia)
Zeruko argi leunak soslaiak baino ez ditu uzten erakusgai. Arratsa heldu da eta hor behean gauerako prestatzen hasiak dira denak.
Malesco (Italia)
Eguzkiak zerua argiztatzeko baino ez du indarrik arrats partean eta horrek lilura sortzen digu. Bitartean, kale-argi xumeek astro handiaren lanari segida ematen saiatzen dira. Baina argitasuna soilik tarteka ekartzea lortzen dute.
Malesco (Italia)
Gaueko orduak datozela, kale-argiek ematen diote segida herri honen paisaiari. Elizako dorre altua, harri landu argiaz egindakoa, nabarmentzen da bestee eraikuntzen artean eta inguruko mendien aurrean.
Malesco (Italia)
Udaberrian egon ba gaude. Giroan ere nabari da, baina hemengo mendi gainetan elurra da nagusi oraindik. Kostatzen zaio urtaro sartu berriari garaiera hautetako txokoak epeltzen.
Appenzell (Suitza)
Negu hotza da aurten. Mendi gainetan eta haraneko zelaietan elurra barra-barra aritu du. Negu beteko giroan murgilduak gaude.
Thun (Suitza)
Negu hasierako elurrak harroken forma bihurriak zuritzen ditu. Zuhaitzak berriz ezin ditu estali. Bestalde, argi-iluna sortzen dute.
Wasserauen (Suitza)
Appenzelleko mendi haranetan inguruko eskualdeetatik bereizita bizi izan dira bizilagunak, bizimodu gogorrari aurre eginez baina paraje zoragarriez gozatuz ere.
Flumserberg (Suitza)
Mendi gainak elurrez betetzen dira negua heltzen denean. Gelditu da aldi baterako bizitzaren gurpila. Animaliak eta landarak lotan daude, etortzeko diren egun luze eta epelen zain.
Flims (Suitza)
Pinudi bukatzen den lekuan, erakusten du haitz biluziak bere handitasuna harro. Karkabak, harri solteak, belardi eremuak eta elurrak apaindua ageri du bere nortasuna.
St. Gallen (Suitza)
Mendigoizaleen ilada luzatzen doa martxa aurrera doan bitartean. Baina inor ez dauka presarik. Inguruaz gozatzea eta lagunekin hitzegitea da helburu nagusia.
St. Gallen (Suitza)
Mendi martxa St. Gallen inguratzen duten mendixketan zehar. Paisaiaren edertasuna gozatu, mendiaren lasaitasuna barneratu eta konpainia onean ibiltzeko aukera. Amaieran bazkari bapoak itxaroten badu, orduan bai biribildu dela plana.
St. Gallen (Suitza)
Mendian gora etxaldeak eta larreak. Garai batean basoa eta animali basatiak ziren nagusi. Gaur egun, baina, gizakiak bere kasara itxuratu du Suitzako mendialdea.